Mehtiyeva Püstə

Mən, Mehdiyeva Püstə Tahir qızı 1961-ci ildə Bərdə rayonunun Həsənqaya kəndində anadan olmuşam. Orta məktəbi də orada əla qiymətlərlə başa vurmuşam. Sonra Şuşa Beynəlmiləl Pedaqoji məktəbinə daxil olub, 1980-ci ildə həmin məktəbi fərqlənmə diplomu ilə bitirmişəm. Pedaqoji fəaliyyətimə Saatlı kənd orta məktəbində başlamışam. Daha sonra təhsili davam etdirmək məqsədilə Gəncə Dövlət Pedaqoji Universitetinə daxil olub, 1992-ci ildə həmin universitetin “Ibtidai təhsil metodikası və pedaqogikası” fakültəsini də əla qiymətlərlə bitirmişəm. O vaxtdan Bərdə şəhər 5 saylı orta məktəbində fəaliyyətimi davam etdirmiş, 2004-cü ildən isə seçim əsasında Akademik Zərifə Əliyeva adına Bərdə şəhər texniki fənlər təmayüllü məktəb-liseydə ibtidai sinif müəllimi olaraq fəaliyyətimi davam etdirirəm.
Hələ fəaliyyətə başladığım ilk illərdə daim öz işimə böyük məsuliyyətlə yanaşmış, yeniliklər axtarışında olmuşam. 44 illik fəaliyyətim boyu cəmiyyətimiz üçün yararlı vətəndaş yetişdirmək əsas məqsədim olmuşdur.
İstər ənənəvi təhsil dövründə, istərsə də 1999-cu ildən respublikamızda uğurla aparılan təhsil islahatından sonra, yeniləşən təhsil “cığırı” ilə getmək və eyni zamanda təlimə şagirdlərimin “maraq dünyası” prizmasından yanaşmağı, kiçik şagirdlərimin qəlbinə qədər enməyi, bugünkü nailiyyətimi unudub sabahımı planlaşdırmağı özümə deviz seçmişəm. Hər zaman da öz işimin peşəkarı olmağa cəhd göstərmişəm.
Müasir şəxsiyyətyönümlü təlim şagirdlərdə müstəqil şəkildə araşdırma və tədqiqat aparmaqla bilikər əldə etmək, sərbəst fikir yürütmək, əməkdaşlıq etmək və s. kimi bacarıqların formalaşdırılmasını tələb edir. Bu məqsədlə gündəlik dərslərimdə fəal təlim üsullarından, yeni təlim üsullarından, yeni təlim texnologiyalarından yerli-yerində istifadə edirəm. Bunun nəticəsidir ki, dərs keçdiyim şagirdlər yuxarı siniflərdə də fəallıqları, sinifdənkənar və məktəbdənkənar tədbirlərdə iştrakları ilə müəllimlərin, məktəb kollektivinin böyük hörmətini qazanırlar.
Müəllim o kəsdir ki, o hər an, hər dəqiqə öyrənir. Mən də həmişə öyrənməyə can atmışam. Aldığım bütün bilik və bacarıqları təkcə öz işimdə tətbiq etməklə vəzifəmi bitmiş hesab etmirəm. Daim axtarışda olmağı, nəyi isə öyrənməyi və bildiklərimi kiməsə öyrətməyi özümə borc bilmişəm. 2000-ci və 2010-cu il arası dövrlərdə Azərbaycan Müəllimlər İnstitutunda dayaq məntəqələrinin rəhbərləri üçün təşkil olunmuş “Öyrədənlərin öyrədəni” proqramı üzrə 3 mərhələli təlim kursunu bitirərək “Öyrədən” statusu almışam. Və lazım olduqca Bərdə müəllimləri üçün yeni təlimlə bağlı təşkil olunmuş kursların aparıcısı olmuşam. 2004-cü ildən hər il rayon İcra Hakimiyyətinin, rayon təhsil şöbəsinin və məktəbdaxili fəxri fərmanları ilə təltif olunmuşam. 2008-ci ildə İKT-nin təhsilə tətbiqi üzrə “Müəllimlərin Peşəkarlıq Fəaliyyətinin Təkmilləşdirilməsi” proqramı üzrə, 2009-cu ildə “Interaktiv təlim metodları” proqramı üzrə, 2011-ci ildə Müasir Təhsil və Tədrisə yardım Mərkəzinin “Kurrikulumun tədrisi” proqramı üzrə təlimlərdə iştrak edib ən yüksək kateqoriyalı sertifikatlar almışam. 2011-cil ildə Azərbaycan Jurnalistləri Həmkarlar İttifaqı Rəyasət Heyətinin qərarı ilə “Xan qızı Natəvan” mükafatına, 2012-ci ilin fevral ayında Azərbaycan Respublikası ”Təhsil” Mərkəzinin “XXI Əsrin Ziyalısı” Fəxri Diplomuna layiq görülmüşəm. 2012-ci ilin iyun ayında “Elektron Təhsil” Respublika Müsabiqəsində “İbtidai Təhsildə İKT-dən istifadə üzrə ən yaxşı metodika” nominasiyası üzrə respublika birincisi olmuşam. (riyaziyyat fənni üzrə). Qiymətli hədiyyəyə və diploma layiq görülmüşəm. 2013-cü ildə “1 şagird 1 kompüter” müsabiqəsinə qoşularaq yüksək bal qazana bildim. 247 layihədən müsabiqənin finalına çıxan 10 layihədən biri də mənim idi. Müsabiqənin qaliblərindən biri də mən oldum (“Azərbaycan dili” fənni).
2014-cü ili isə pedaqoji fəaliyyətimin ən yüksək zirvə ili hesab edirəm. Belə ki, sinif müəllimi olduğum 11c sinif şagirdləri Bərdə təhsilini Respublika təhsilinin ən yüksək zirvəsinə qədər ucalda bildilər. 6 nəfər şagird 600 - 692 bal toplayaraq ən yüksək nəticə əldə etdilər. Bir sinifdən 3 nəfər şagirdim isə “Prezident Təqaüdü”nə layiq görüldü. İsmayılova Səbinə Vüqar qızı 692 balla Azərbaycan Respublikası Prezidenti yanında Dövlət İdarəçilik Akademiyasının Beynəlxalq Hüquq fakultəsinə, Şükürova Mədinə Eldar qızı 690 balla Ali Heft Akademiyasına, Eminov Kənan Zabil oğlu isə 680 balla Dövlət Tibb Universitetinə qəbul olunublar. Bu Bərdə təhsilinə şərəf gətirən ən yüksək göstəricidir. Ümumilikdə bir sinifdən 22 nəfərdən çox şagird Respublikanın ən yüksək ali məktəblərinə qəbul olundular. Bu sinfin uğurlu nəaliyyəti məktəbdəki buraxılş siniflərinin ümumilikdə əldə etdikləri nəaliyyətdən çoxdur. Zəhmətimin bəhrəsini görmək məni çox sevindirir və daha böyük uğurlar əldə etmək üçün məsuliyyətimi artırır. 44 illik fəaliyyətimi əks etdirən fotoalbom Təhsil Nazirliyinin muzeyinə təqdim olunmuşdur.
2010-cu ildə Azərbaycan Respublikası Prezidentinin sərəncamı ilə keçirilən “Ən yaxşı müəllim” müsabiqəsinin qalibi olmuşam.(müsabiqədə Mərkəzi Aran və Qərb Bölgəsi üzrə ən yüksək bal toplayan mən olmuşam. Xatırladım ki, Bərdədən mənimlə bərabər 7 müəllim də müsabiqədə iştirak edirdi.) Həmin ildə 94 saylı Bərdə kənd seçki dairəsindən Milli Məclisə deputatlığa namizədliyim irəli sürülmüş və namizədliyim yuksək seçici dəstəyi ilə müşahidə olunmuşdur.
2014-cü ildə Azərbaycan Respublikası Prezidentinin 30 sentyabr tarixli 756 saylı sərəncamı ilə “Əməkdar müəllim” fəxri adına layiq görülmüşəm.
2016-cı ildə Azərbaycan Prezidenti İdarəçiliyi yanında “Bilik Fondu” ilə “Azərbaycan Müəllimi qəzetinin birgə təşkil etdikləri fəal təlimlə bağlı”Ən yaxşı yazı”müsabiqəsində iştirak edərək həvəsləndirici yerə layiq görülmüşəm.
2018-ci il noyabr ayının 18-də keçirilənn Azərbaycan Respublikası müəllimlərinin XV qrultayının nümayəndəsi olmuşam.
2024-cü il 02 fevral tarixində Azərbaycan Respublikası Prezidentinin 4289 saylı sərəncamı ilə “Heydər Əliyevin 100 illiyi” Azərbaycan Respublikasının yubiley medalı ilə təltif olunmuşam
Ailəliyəm, 3 övladım var. Bərdə şəhəri H.Əliyev prospekti 2/8 saylı ünvanda yaşayıram.